KUCHING – Julok ati bala Parti Keadilan Rakyat (PKR) Sarawak ka begempuru ba Old Court House, Kuching sari tok enda ngipak ka auh, semina 18 iko raban parti ka bisi datai ngayan kediri.
Sebedau tok, PKR Sarawak balat chapuh ba Facebook madah kediri ka mai bala mayuh begempuru, tang enda mukai-mukai, raban parti ke bukai enggai ngiruh kediri.
Ka bendar ia, pengawa begempuru lemai tadi enda nyalah baka manjung ba pala wong.
Enti nunda, beratus-ratus iko bala penyukong PKR datai, tang lemai tadi nyau bisi 200 bala pulis enggau ngeluie 50 iko pemberita ngulu Chermin PKR Sarawak, Baru Bian.
Baru Bian maia ngemansut ke jako ba upis PKR sitak Stampin pagi tadi madah, ia udah sedia ka ngemantai ka bukti maia ka belaban penemu enggau Ketua Menteri Sarawak Pehin Sri Abdul Taib Mahmud ba senentang tanah NCR ba menoa tok.
Baru madah, ia ka datai ba Old Court House pukul 4.30 lemai, ianya palan endur Rajah Putih tauka White Rajah kala ngaga aum Dewan Undangan Negeri. Ia ka macha surat jako Charles Brooke ka balat endar mekat sida orang asal mesti ngemeran ka tanah NCR.
Bekau arinya, pukul 12 tengah ari tadi, bala polis bergempuru ba Kuching Waterfront. Bala polis bisi meresa kereta ka mansa Jalai Kho Hun Yeang nuju Kuching Waterfront.
Pukul 4.15 lemai, tiga iko bala PKR datai, udahnya Baru Bian chun pukul 4.30 lemai. Bisi datai seketeri PKR Sarawak, Abang Zulkifli Abang Engkeh enggau Ketua Pemuda PKR Sarawak Ahmad Nazib.
Udahya Baru Bian bediri ba tanga Old Court House alu macha ingar surat jako Sir Charles Brooke. Nasib ga maianya nadai nama-nama utai enda manah nyadi.
Lebuh ke ditanya bala pemberita ba senentang pulis ka mayuh datai, Baru Bian madah ia berasai tekenyit ati laban enda nyaga utai bakanya.
“Tang manah ga sida pulis datai, nyaga pengelikun. Aku nadai penanggol enggau bala pulis, arap ka sida mega mujor ba pengawa nyaga pengelikun rayat,” ko Baru Bian.