Bansa Dayak anang jugau deka dikemelika penyakal

Utusan Borneo, May 10, 2010, Monday

SIBUTI: Raban bansa Dayak di menua tu dilalau ngambika enda mudah dikemelika bala raban ari parti penyakal,  lebih agi ba maya nyau semak deka  muai undi ba pengawa bepilih mit Sibu sereta pengawa bepilih besai menua Sarawak empu ti deka datai tu ila.

Sapit Kepala Menteri Datuk Patinggi Tan Sri Alfred Jabu anak Numpang madahka, buah runding sida ari parti penyakal nya, lebih agi sida ari  Parti Keadilan Rayat (PKR) enggau DAP nya agi mabu sereta enda tau dikena.

Jabu madahka, sida semina deka ngulihka undi ‘penyinu ati’ aja, tang  PKR enggau DAP nadai kala sinu ka pemerinsa raban bansa Dayak lebih agi raban bansa Iban rambau menua tu siga diwan kominis kelia.”

“Peda kita maya rita ti deka ngemendarka bekau sekiteri besai Parti Keminis Malaysia (CPM) Chin Peng pulai ngagai Malaysia, sida penyakal (PKR enggau DAP) semina diau sereta enda bemunyi.”

“Nemu enda sida iya mayuh bala sedadu kitai parai maya menua charut dipegai keminis kelia, bisi 19 iku sedadu kitai parai di Semenanjung Malaysia din ketegal ngetan ke menua.

“Nya alai perintah diatu deka mai rangkah sida tu pulai baru ngagai Sarawak lalu dikuburka ditu empu. Sida tu parai sereta dikuburka ba Semenanjung Malaysia din lebuh ti nulung? sedadu Tanah Melayu maya menua siga kominis kelia.”

Iya bejaku munyi nya lebuh ti ngelanchar Pengawa Nyambung Kuasa Karan Menua Pesisir (BELB) ba Rumah Panjai Busang Braoh ba Bukit Kisi, Peninjau, Sibuti  kemari.

Nitih ku Jabu, ulah sida ari PKR enggau DAP  ti semina diau diri aja maya nya kemari mandangka sida iya sigi nadai kala berundingka  peneka ati rayat, tang semina datai kitu minta di undi aja.

Nya kabuah, aaiya ngelalau bala  rayat Sarawak tu meri tabi basa ngagai sedadu ari menua  Sarawak tu ti udah parai nya, sereta anang nukung bala penyakal ti enda meretika pemerinsa ti udah ditengah  rayat.

“Nya meh kabuah, aku ngelalau raban bansa Dayak ngambika sida iya anang malik ngagai sida penyakal.”

“Ba penemu aku, bansa Dayak lebih agi raban bansa Iban ti nyukung penyakal ba maya pengawa bepilih mit sibu tauka maya bepilih besai ila tau dikumbai enda ngenang sereta bebasaka pengawa aki inim enggau bala anak sida ti ngelaban bala kominis kelia,” ku iya.

Ku iya, enti rayat majak meri sukung ti penuh ngagai perintah Barisan Nasional (BN) udah tentu tiap bala mensia mayuh ti diau ba pasar enggau menua pesisir bulih pemansang sereta perengka diguna mensia mayuh.

Beserimbai enggau nya, Jabu madahka, ba Langgur Pemujur Besai Menua (NKRA) deka ngangkatka pemansang infrastruktur menua pesisir  ba Semenanjung, Sabah enggau Sarawak sereta enggau aspirasi deka  menyediaka kuasa karan 24 jam ngagai lebih ari 140,000  isi rumah  ba taun 2012. Tu meh siti ari program besai ti udah di langgur perintah menua Malaysia.

“Langgur tu deka ngangkatka penyampau ruang bilik ke deka bulih kuasa karan di Sarawak ari  73 persin ba taun 2010 ngagai 95 persin ba taun 2012 ”, ku iya.

Projek nyambung kuasa karan ngagai menua pesisir tu digaga enggau ungkus RM7,013.45. Mungkur empat iti rumah panjai iya nya Rumah Busang sebanyak 23 pintu, Rumah Gan (10), Rumah Jumat (23) dan Rumah Bidol (20) dengan penduduk seramai 569 orang. Projek tu udah tembu dalam bulan November taun 2009.