Dikarang Dr. Jeniri Amir
Diambi ari Sarawak Update

Mulai ke tansang pengingat, aku ada ba Kampung Tellian Tengah, Mukah. Lebuh maia umor mangai tujuh taun ianya maia 1965 aku berengkah besekula ba SRK Kampung Telian. Udah bekau mujor ba Common Entrance ba taun 1970, aku alu nyambung belajar ba Sekolah Menengah Bantuan St Patrick, Mukah berengkah ari 1971.

Enti enda salah aku, semina 12 iku ari 30 iku anembiak mujor ba peresa darjah enam maianya. Enti nunda, aku semina dipasukka ka ba rintai kedua anembiak ka dipilih nyambung sekula ba sekendari.

Naka meh pengaga ati aku meda nama nadai dipilih nyambung sekula ba sekendari. Ba ati aku sigi nadai runding bukai – ka main gudi tauka layang-layang munyi ko jako kemaia ari tuk.

Aku agi ingat maia agik mit, sigi rindu amai nerebai ka gudi. Belanda kin kia, ngena kaki manuk ngagai gudi ka udah putus tali. Asai ia dunya tok aku empu, empa pengerindu aku maianya.

Enda alah ditusi, naka pemaioh pengingat aku ba sekula primari, bisi nya ngerindu ka ati alu bisi ga ngasuh ati sinu.

Kaka enda cukup vitamin

Pengidup maianya balat merinsa, sampai enda chukup pemakai. Kami beridup makai sagu enggau linut. Setegalnya, tubuh aku nyau baka cicak kubin nambah ka agik penyakit kaka laban enda cukup vitamin.

Bisi sekali, pengajar ngasuh aku belanda musin padang sekula ba moa anembiak bukai, setegal enggai mukak baju maia latihan jasmani. Ukai aku enda bebasa ke pengajar, tang malu ngayan ke tubuh diri penuh kaka nyau ngerampit kulit palak. Bisi ga aku ngasai enda puas ati, laban pengajarnya enda kala nanya nama kebuah aku enggai mukak baju.

Lengka ka cherita kaka, aku nusi pengidup kami ba Tellian Tengah. Baka bala ke bukai, rumah maianya sigi nadai entu menyana, ngena atap rumbia. Nadai jalai alun, nadai ai, semina ngena ai ka di sauk ba sungai. Lebuh malam ari, kami ngena lampu gas.

Pandak jako, pengidup tauka survival kami maianya chukup bepangai ba kampung enggau babas. Salah jako, enti bisi pemati baru bisi peluang makai dagin. Kelimpah arinya, kampung enggau babas nya meh nyadi kedai endur begiga ke utai pemakai kena ngidup kediri.

Ubah pemansang diatu

Diatu pengidup ba Tellian Tengah udah mayuh insur. Rumah udah bisi jalai alun, karan 24 jam, ai paip beresi serta mayuh infrastruktur ke bukai. Penyampau pemerinsa ba ruang bilik udah jauh nurun. Anembiak ka nyambung sekula ba universiti majak nambah ari taun ke setaun. Enti enda saru aku, penyampau anembiak ka pas kolej enggau universiti diatu udah ngeluie 150 iku.

Ba senentang penatai pemisi, nyau ke semua pintu rumah ba Tellian Tengah ngembuan kerita enggau mutosikal.

Bisi siti jerita ka meruan dikingat ka aku datai kediatu. Lebuh maia ka peresa awam darjah enam, aku enggau sekeda iku anembiak (sama rebak), nyengkaum Dorhat Rohani enggau Abdul Rahman Amin belajar ba kelas. Maianya nadai karan. Kami nungkun api kelita ngena minyak gas. Udahnya achuk enggau jari lubang idung, apu nyau chelum baka baruh periuk asi ka dipanduk ba dapur kayu.

Udah ga lubang idung chelum, perut ka selalu engkeriok, baka ka enda kala makai setaun. Utai ka dipelajar enda entu masuk untak, laban perut ka selalu lapar. Runding bekira nama ka ngga utai ke diempa.

Penanggul ba sekula primari

Kenyau ka udah gawa ba nengeri, aku enda suah pulai ke menoa. Taja pia, Tellian Tengah kelebih gik sekula primari meruan dalam pengingat. Taja pan maia mit idup merinsa, tang diatu nyau bebali manis. Munyi ko jako sempama Melayu tempat jatuh lagi dikenang, inikan pula tempat dilahirkan dan dibesarkan.

Ba penemu aku, kitai enda tau buai batu enggau menoa penatai diri empu. Nya kebuah, lebuh sekula nya ngangau ngasuh aku meri perais ngagai bala anembiak darjah enam ka peresa UPSR ba taun 2007, aku alu nerima enggau ati temegah.

Ba pengeraminya, aku diasuh mantai ka penemu ba senentang pengawa sekula. Maianya, apai aku – diatu udah nadai – mega datai mending enggau meda aku bejaku. Besai pengaga ba mua apai, meda anak iya, keterubah bejaku ia ba mua mensia mayuh. Maianya aku benung nembuk ka Phd.

Enggau peluangnya, aku betusi ke cherita pemerinsa enggau penusah idup. Kebuah aku nyerungkai ngusai ke jerita lama ambi ka bala anembiak rebak baru siru ka diri empu alu ngembuan ati ka ngubah pengidup nyadi orang menyana.

Anang alah laban pemerinsa

Aku bisi ngelalau bala anembiak enggau apai indai, mesti ka bisi pengeliat, pengeransing enggau pengempang ati ka mansang. Anang nyepi diri empu merinsa, tusah, lalu diau diri enda kebut-kebut. Pemerinsa ketegal ti ngiga insur pengidup ke menyana agi patut nyadi ke chuan nyadi ke teladan, nyadi ke tengau nyadi ke lalau, nyadi ke penerang nyadi ke peransang.

Bisi pengarap dalam ati aku, nama kebuah sida sekula enggau PIBG sekula ngangau aku datai. Ba runding, angka sida ngumbai aku pelajar chunto anembiak Tellian Tengah. Ka bendar ia, bala anembiak angka enda nemu, aku ukai anembiak ka pandai maia ba sekula primari.

Setegal pemerinsa idup – enda chukup belanja, makai, gari enggau utai bukai, aku selalu bulih lumor ti enda entu manah.

Bah, nama reti semua utai tok deh? Reti ia, anang kitai ngumbai urang ka enda pandai sekula maia ba primari nadai pengidup jemah ari. Udah mayuh anembiak sama rebak sekelas enggau aku ka pandai, beketepak labuh ke baruh. Anang ke datai ba universiti, pom lima enggau pom enam pen enda sangkai.

Berindik arinya, aku selalu ngasai serta nemu bakani pemedis enggau penusah idup orang merinsa, miskin papa.

Bala pengajar meruan dikingat

Aku meri besai terima kasih ngagai bala pengajar – sekeda udah nadai, sekeda agi udah tuai. Terima kasih ngagai bala pengajar semua – Cikgu Upit, Cikgu Mahmud, Cikgu Nura, Cikgu Susek. Bala pengajar meh ka meri penenggau, meri ajar enggau lalau ngasuh idup menyana.

SRK Kampung Telian meri reti ti chukup besai ba aku enggau ngagai bala kaban ti kala belajar ba sekulanya. Nya kebuah, berasai sinu serta ransing meda sekulanya nadai dikibuh agi lebih ari sepuluh taun ti udah.

Enda nemu bakani aku ka mantai ke penyinu enggau sekulanya, pedis ati pan bisi. Ukai nama aku munyinya, SRK Tellian Tengah udah mayuh ngemansut ka anembiak pandai, sekeda nyadi urang ka bisi nama, bisi reta enggau pangkat nyengkaum wakil rakyat enggau urang korporat.

Kediatu, sekulanya ditutup enda di guna agi, laban nangi ke bala anembiak ka benung sekula. Nya alai, anembiak ari darjah satu ngagai darjah enam di asuh belajar ba SK Mukah, jauh ari pendiau ba rumah.

Kenyau ari nya, mayuh amai penanggol, ukai ajak ari senentang pengelikun, tang anembiak empu ngasai ke endor enda entu menyana. Kelimpah arinya, apai indai mega tusah bekira ka belanja besai laban sekula nyau jauh.

Pekara ka bakatu meh ti ka ngemedis ka ati rayat kelebih gik maia ka bepilih.

Danji maia ka bepilih

Maia bepilih nyau majak semak. Sekeda danji maia bepilih suba nadai nyadi. Rayat mantai ke pengirau diri empu, ngica ka peminta sida didinga perintah enggau bala besai.

Empai lama ti udah, bisi sekeda raban ka kala sekula ba SRK KampungTellian ka ngemantai ke peringat sida ba surat khabar, laban nadai chara bukai agi.

Chermin Persatuan Bekas Pelajar SK Kampung Tellian (PBPSKT) Robin Junang madah ka,

Opis Perdana Menteri ba Putrajaya udah merik duit RM6 juta dikena ngaga sekula baru ba nalan ti ngembuan pemesai 10 hektar.

Dato Sri Muhammad Leo Abdullah udah betemu enggau Perdana Menteri Datuk Seri Najib Tun Razak empai lama ti udah.

Nama kebuah, mesti bepuluh-puluh taun rayat nganti baru perintah meri berita manah? Kitai besai ati, ngarap ke berita tok nyentuk, ukai jako sebuku ngapa tauka danji manis politik.

Bala pemerintah politik enggau wakil rayat mesti ka ngeleda, siti isu ti meruan nanggul sida lebuh maya ka bepilih enggau maia bekimpin – rayat nagih danji maia bepilih suba.

Taja pan singkang kaki aku udah lama ninggal ke menoa, tang penyayau ngagai sekula lama enda kala lesi. Aku ngarap sida wakil rakyat ke udah bedanji enda bula ke semaia!

*Penulis ialah pensyarah kanan di Universiti Malaysia Sarawak

PLEASE PRINT AND SHARE WITH OUR IBAN COMMNITY IN THE RURAL AREAS