This is a brief explanation by Mr. John Adam Gilbert of the various component of an Iban bilik in a longhouse. I am sorry, it was written in Iban language. Any translator?
Gaya bilik ba rumah panjai dirintai ka baka tu berengkah ari ujong bilik dapur nyentuk ka tanju.
- Jamban & Bilik mandi;
- Bilik Dapur;
- Bilik Makai;
- “Antara Rumah” – mesti bisi diantara bilik besai enggau bilik dapur laban nya jalai angin tama ngagai rumah lalu ba nya mega nyadika alai orang mela utai diempa baka netak lauk. Enti rumah panjai nadai digagaka antara ba bilik besai enggau bilik makai, nya ke dikumbai orang ka tuai menya jako “Karam Di Darat” reti nya nadai endor enseput empa pengangat bilik orang nya ke alai datai nemuai.
- “Bilik Besai” – tu ti alai begempuru tauka bejako ka pengawa ti numbas iya pemesai;
- “Tempuan” – tu alai orang bejalai niti rumah baikka nya leboh orang nganjung bangkai mansang ka pendam tauka mai bangka nya tama rumah panjai lalu nuju bilik orang ke bempu penusah. Tempuan mega alai urang niki ka pengabang maia begawai tauka melah pinang. Tempuan tu mega alai orang bejalai, baik ngereja pengawa manah tauka jai.
- “Pantar” – tu nyadi ke alai orang makai leboh maia bisi pengerami ke besai baka begawai tauka nikah lalu ba alai tu mega nyadi ke alai kitai Iban ngaga Sapat leboh maia orang ke nyengai antu orang ti parai sereta mega nyadi ke alai orang Niri Ka Pandong leboh maia niri ka Gawai Batu, lalu ba alai tu mega nyadi ke alai orang niri ka Pagar Api leboh maia manang belian, lalu niti pantar tu mega nyadi ke alai bala Lemambang mengap sereta orang ke ngirit Buloh nuntong ka Buloh leboh maia Gawai Antu.
- “Ruai” – tu alai orang ngereja pengawa leboh ke ngintu pengerami besai, betunggong bebala maioh sereta nyadi ke alai endor kitai dudok nunga temuai ke datai ngagai rumah panjai. Lalu ba endor tu meh nyadi ke alai bala Lemambang Nuntong ka Jalong leboh maia Gawai Antu.
- “Tanju” – tu kelia leboh maia rumah panjai ke bengantung nya nyadi ke alai kitai Iban bejemboi ka padi sereta beribut ka padi, bejemboi ka kelapis getah ulih nagkal, bejemboi ka gari enggau nyemboi maioh agi utai ti diguna kitai besari-sari. Lalu ba tanju tu mega nyadi ke alai endor orang engkah Sungkup leboh maia ngintu Gawai Antu. Nyadi diatu laban rumah nyau melasar tanah nya alai bisi baroh Verandah nya nyadi ka tanju nitih ka plan rumah ba menoa kami.
- “Sadau” – tu nyadi ke alai orang tindok lalu nyimpan semoa rengka kena gawa ngidup ka diri. Lalu diatu maioh orang ba menoa kami nyau begaga ka bilik ba sadau sida. Nyadi pemesai sadau tu iya nya selampur berengkah ari pemanjai Bilik Besai nyentuk ka ngeluia ruai nya mimit.
Nyadi nya meh gaya ripih bilik asal rumah panjai kitai Iban ti endang dititih ka plan rumah baru ba menoa kami di Sebelak, Roban jam kediatu lalu tau dipeda kita ba video dalam wall page aku ke diatu.