Lapa enda disukat terus ngena Sek.18 Kanun Tanah Sarawak?

Tu siti ari tanya ke suah endar dibaca kitai ba media sosial, serta minta disaut ari bala pemesai kitai bansa Dayak.

Aku pan baka kita maioh, deka ka tanah NCR kami serumah disukat ngena Sek.18 KTN.

Ukai bala pemesai kitai Dayak enda ituk minta serta nagih Jabatan Tanah Dan Servei Sarawak (JTS) ngambika sida iya nyukat tanah kitai ngena Sek. 18 KTN; tang penanggulka besai amat diatu ba JTS ianya sida iya enda cukup tubuh/staf tukang sukat.

Dalam siti Bahagian, nyampau aja mih tubuh sida ke tau nyukat tanah (ground work). Sida ke bukai, ke ba upis nya semina kakitangan pengurusan serta penguatkuasaan. Dini enda dipeda kitai baka ke maioh tubuh/staf sida.

Ambi ka chunto ba upis JTS Bagi Miri, enti semua orang asal minta tanah sida disukat ngena Sek.18, sigi enda ulih dibayangkan ni maia pengawa nyukat tanah nya ulih tembu. Nya pan enti nadai penyarut ba entara tanah siku-siku, ka suah endar didinga kitai nyadi.

Kitai suah endar ninga penyarut entara tanah entara diri menyadi, diri sebilik, tauka enggau urang bukai ka tau disebut kitai amat serius.

Enti bisi penyarut entara tanah, sida bala staf JTS sigi enda nganti kitai, tang ngagai menua bukai, ngagai bala ke empu tanah NCR ke nadai penyarut.

Taun baru tu ila, munyi ku jaku padah Datuk Amar Douglas Uggah maia aum DUN ke baru udah tembu, perintah GPS nengeri Sarawak ke betuaika Kepala Menteri YAB Datuk Patinggi Abang Jo udah meri belanja RM40 juta kena pengawa nyukat tanah NCR kitai dalam taun 2019 tu ila.

Perintah besai PH pan udah meri belanja RM21.5 juta bagi taun 2019. Kitai arap belanja tu ulih dianjung sida enggau lengkas.

Ditambah mega, nitihka jaku YAB Abang Jo maia Simposium Iban di Bintulu, dia staf JTS deka diserap ngagai kompeni private surveyor, kena nambahka tubuh bala tukang sukat di nengeri kitai.

Nya alai, kena kitai napi pemanah perintah GPS tu, kitai ba rumah panjai patut belabuh numbuhka Komiti Nyukat Tanah ngambika ulih berengkah ngerintis entara tanah dalam kandang rumah panjai kitai.

Enti bisi penyarut entara, kitai arapka ulih diputar enggau manah sebedau bala raban JTS datai ba menuo kitai.

Leave a Reply