Atur pemansang tanah NCR deka nguntong ke rayat

Penerang pasal pengawa nyukat tanah NCR di Lubok Kerukoh, Budu, Saratok.

Diambi ari Sarawak Upate

Sigi enda ulih dibantah, atur pemansang estet ba tanah hak adat bumiputera (NCR) enggau bantu kompeni swasta ulih ngasuh urang ka ngempu tanah untung. Tok meh cara ti pemadu manah ngambi ka tanahnya enda tebasau ngapa.

Pemansang tanah ngena atur betanam betupi ti moden deka ngemansang ka tanah ti puang, ngambi ka urang ti ngempu enda rugi.

Kati ka enda sayau, laban tanah ka diperumpang niang aki ini kelia kenyau ari beratus taun suba, enda dikereja ngujung ka repa. Enti nitih, tanahnya ulih ngemai pemansang ba penatai pemisi ti chukup nyulut. Tok meh kebuah bala bansa kitai agi jauh tinggal ba belakang, agi merinsa.

Perintah nengeri kenyau ari suba sigi ngemeran ka pemansang infrastruktur ngambi ka rayat sama-sama chakah ati negereja tanah sida. Tang, mayuh gi sida to agi ngena chara lama ka dikumbai urang kemaia ari tuk ‘smallholders’. Smallholders tuk semina bisi tanah dua ngagai tiga ekar ba nisi rumah.

Perintah nemu, enti utai tuk enda diatur, anembiak ba menoa pesisir deka murih pemerinsa aki ini apai indai sida.

Pengawa ba betanam betupi ke batang ia udah majak kurang kenyau ari taun 1970-an suba. Ngambi ka pengawa betanam betupi tuk ulih dikemansang kitai nadai chara bukai tang ngena formula ka baru.

Penanggol keterubah, infrastruktur enda chukup alu kedua rakyat enda nemu chara betanam tupi ti moden.

Semina beberapa iko ajak ulih ngena chara tok, nya pan bala sida Cina.tok meh kebuah mayuh tanah NCR enda dikereja. Ari pemesai tanah 20 ekar, ¾ tanah puang.

Diatu bisi penyampau sejuta hektar tanah NCR, tang ¾ ari pemesainya nadai dikereja. Ia ke bendar, bala sida peribumi to semina kaya tanah, tang mensekin ba penatai pemisi. Utai tok enda patut di lak ka.

Ka batang ia, urang ti udu ngaga atur pemansang tanah nyadi isu, semina ka ngasuh rayat saru lalu ngenyai ka kaul rayat enggau perintah. Sida tok meh ti deka ngemai rayat majak merinsa.

Berindik ari nya, perintah nengeri diatu deka nyaup ngemansang ka tanah, ngambi ka ulih mai pemansang. Enggau tanah pemesai sejuta hektar, perintah ulih nyedia ka peluang dagang enggau kereja.

Diatu enti kitai meda ari atas, mayuh amai estet, ngelui kampung, nanda ka pemayuh untung ari ka tanah enda diintu.

Perdana Menteri Datuk Seri Mohd. Najib Tun Abdul Razak udah meri RM20 juta dikena ngaga pengawa nyukar parameter tanah. Ia mega udah setuju ka mayar semua tanggung pengawanya.

Udah disukat enggau disurvei, nadai urang ulih ngachau tanah nya agi. Urang ti ngembuan tanahnya ulih ngintu tanah NCR nya nitih ka peneka diri empu. Pekara ba senentang tok patut padah enggau silik bala parti BN ngagai rayat, ngambi ka dudi ari nadai charut.

Tang sida pembangkang nyengkaum pertubuhan ukai kerajaan (NGO) kering mai rekong ngelaban, madah ka perintah ngambi tanah rayat.

Lapa sida enda nemu, rayat ulih mai pekara tok ba makamah enti sema enda setuju enggau pemutus ba senentang tanah tauka duit pampas. Enti sema tanahnya sigi rayat empu, perintah mesti ga nitih. Perintah amat bebasa ka pemutus makamah alu enda kala ngelaban pemutus ba senentang pekara tanah.

Semina bisi siti kes, kira ka 20 taun ti udah maia perintah nengeri nerima komplen ari Rh. Chang ba Niah ti madah ka tanah sida diambi perintah alu diberi ngagai urang ke tiga.

Ketua Menteri, Pehin Sri Abdul Taib Mahmud alu nurun ngagai upis Jabatn Tanah enggau Survei ba Miri alu ngasuh pegawai dia ngiga bukti ti madah ka tanah nya udah diberi ngagai Rh. Chang. Kupi suratnya bisi ditemu ba siti fail upisnya.

Enti perintah sigi ka ngambi tanah rayat, lapa perintah enda nyarik ka surat nya serta nikau dalam bakul sampah? Tang perintah tok manah. Lebuh Taib meda suratnya, ia alu ngasuh JTS mulai ka tanah nya ngagai Rh Chang.

Udahnya, perintah alu mayar pampas ngagai siti kompeni ti udah mayar duit meli tanah nya serta merik tanah baru ke bukai. Nya kebuah tanah Rh Chang nya agi meruan sampai diatu.

Rayat di ambi tanah ulih ngemai pekara tok ngagai makamah. Enda ibu betalat bangat udu, laban perintah udah mayuh ngemansang ka tanah nengeri di kena ngemansang bala peribumi, nyampau gi ari tanah NCR.

Pembangkang semina nemu ngemeli enggau ngasa ka rayat, nuduh perintah ngambi tanah rayat. Enti sida amai-amai ka nulong, sida enda patut nyarut ke utai, enda patut masuk campur makamah. Lak ka makamah netap ke pemutus sapa ti ngempu tanah.

Pembangkang nyau enda ingat, Sarawak ngembuan premium tanah ti pemadu murah ba Malaysia nyengkaum Selangor enggau Pulau Pinang.

Pulau Pinang enggau Selangor meri premiun ti tinggi. Tang pembankang enda kala muji, semina nemu nganu.Sida enda nemu, asilnya dikena ngemansang ke tanah ba nengeri tok sereta nulong rayat bulih rumah.

Bisi sekeda rayat menoa tu empu ngemai bala ari menoa bukai ngaga kachau serta pengawa enda entu menuku, ngambi ka perintah enda mukak ladang sawit. Baka ga sida ia nemu agi ari kitai empu bakani ka nyaga alam sekitar. Sida patut ngetu ke pengawa ti bejai perintah ba senentang tok.

Perintah nengeri nanam sawit mayuh ngambi ka ulih ngeluar ka mayuh asil. Minyak sawit ulih digaga biofuel kelimpah ari produk tenikal. Reti ia, Sarawak deka ngembuan industri betanam betupi ti nyulut. Tok ila deka beguna ka mensia mayuh ti ngembuan pemandai lalu meri peluang pengawa puang ngagai bala anembiak kitai dudi ari. Nya meh kebuah kitai nanam sawit ba tanah pemesai sejuta hektar.

Sarawak udah datai ba siti rengat pemansang. Minyak deka rangkai dalam timpoh 10 ngagai 20 tau ti deka datai.nya kebuah, Sarawak deka ngemansang ka industri berat, ia ka enda ulih digaga ba menoa bukai. Diatu Sarawak udah meda lansik ka digaga 30, 40 taun ka udah ti madah Sarawak ngembuan potensi ba karan hidro.

Nitih ka lansik nya, sitak tengah menoa Sarawak ulih ngemansut ka lebih 20,000 megawatt karan, kelimpah ari arang batu ti chukup mayuh.

Ba rengat 10 taun ti deka datai, rega minyak di adang ka majak mar. Penyampau minyak ke temu udah kurang, tang peminta majak niki, ti ngasuh rega minyak mar. Diatu minyak setong dijual enggau rega US$100 setong. Enggau penyarut ba menoa Libya, rega deka niki ngagai US$110 setong.

Nya kebuah, perintah keran amai ka ngaga karan hidro dikena nape semua ulah rega ti ka niki. Taja pan rega siti hidro baka Bakun ngena duit berbiliun-biliun, tang perintah nengeri enggau persekutuan udah bersemekih ngiga duit dikena ngadu ka prujek nya.

Kediat, pengawa dagang ba produk Halal amai besai, kelebih gi ba menoa Amerika enggau Eropah. Dagang halal ulih untung 1 triliun tauka USD$1,000 biliun dalam kandang dua taun.

Malaysia, siti menoa Islam ngembuan kriteria ti chukup manah, kelimpah ari atur sijil halal ti cukup silik. Kitai mega amat betati ke pemeresi enggau kualiti pemakai. Produk Halal tok chukup nguntung ke menoa, laban ba Malaysia ia ukai semina ulih digaga sida ka pengarap Islam.

Urang dagang kitai patut berunding bakani ka enggau dagang tok serta bulih untung ari menoa Timur Tengah, Republik Asia Tengah enggau uran Islam ba Eropah enggau Amerika.

Tok meh chara baru ngagai urang ba Sarawak dikena ngadu ka diri empu. Pengawa dagang tok deka meri peguntung besai ba kandang 20 taun di ka datai. Penatai pemisi pan deka nambah lima enggau enam kali enti banding ka enggau diatu. Nambah ka nya, prujek Score deka nyedia peluang kerja penyampau 1.5 juta.

Pemansang tok meh ti patut digaga enggau ngasuh rayat Sarawak temegah ati!

Leave a Reply