Ulu Krian Pioneers

Gambar diambi ba kebun Sungai Kara di Ulu Krian
L-R: Chuat ak Rembuyan, Unya ak Chunggat, Chu ak Chundie, Upam ak Subing (ari Dasei), Sendi ak Doo, Lantong ak .., Chundie ak Chunggat, Chunggat ak Doo.

Note: Chu ak Chundie, tauka Inik Uban tu mih indu ke tau nakar, tau engkebang. Pua kumbu Kediri rintai ba belakang sida nya ditenun iya empu.

Cherita Penumboh Menoa Ulu Krian

Beserambau enggau taun ti keterubah Rajah James Brooke merintah menoa Sarawak dalam taun 1841, Doo ak Kantan, siko tuai Iban ke datai ari Paku, Saribas, mai bala iya pindah ngiga menoa ke baru serta lantang endor ngidup ke diri.

Doo ak Kantan ngiring bala iya pindah ari menoa ke di kumbai Nanga Tiang, ari ulu Samu di Batang Paku. Sida Doo maia nya bumai ba menoa ke di kumbai Temawai Tampak Panas, seberai Rumah Begat di Penom, Paku ke diatu.

Bala anembiak Doo ak Kantan semina diau di Temawai Tampak Panas pengelama tujuh taun aja, ari taun 1841-1848.

Pindah ari Temawai Tampak Panas, Doo lalu mai bala iya ngulu Sungai Paku, melunggang ke Bukit Medang serta terengkah di menoa Ulu Krian. Bala Doo terubah datai di menoa Ulu Krian dalam taun 1848 lalu ngentak ka rumah panjai sida ba Lubok Menoa.

Berapa taun udah lepas nya, rumah sida pan nyu ga udah jaik, lalu sida Doo pan lalu angkat pindah ari nya. Sida iya pindah, berumah panjai baru ba endor ke dikumbai Temawai Nyatu.

Angkat ari Temawai Nyatu, sida niri ka rumah baru ba kandang endor ke dikumbai Temawai Sungai Jawah, enda jauh ari Rumah Jawi, Nanga Awas, kediatu. Maia sida Doo ke diau di Temawai Sungai Jawah tu mih iya mati. Udah Doo ke mati, iya diganti anak iya ke benama Chunggat ak Doo, nyadi Tuai Rumah dalam taun 1888.

Ketegal laban perengka ramu ti dikena berumah dulu menya enda baka ke kemaia hari tu, dia deh rumah enda tentu tegap serta jampat endar jaik. Maia nya, sida Chunggat semina ngena kayu ke enda tan serta beratap ka daun kenulang, daun senggang enggau daun kering. Maia tu, bala kitai Iban di Ulu Krian apin bisi betanam ke mulong, ke tau dikena nyadika atap rumah. Maia tu mega, buluh perin dikena ngaga gelegar serta bedinding ke kulit kayu. Ketegal ke rumah jampat jaik, Tuai Rumah Chunggat suah bendar mai anembiak iya berumah baru.

Angkat sida Chunggat ari Temawai Sungai Jawah, sida iya pindah lalu berumah baru ba endor ke dikumbai Temawai Raong.

Ari Temawai Raong, Chunggat mai bala anembiak iya pindah serta berumah baru ba endor ke dikumbai Temawai Emperan. Udah berapa taun udah lepas kediau ba Temawai Emperan, Chunggat lalu mai anembiak iya ngaga rumah panjai ke tegap agi serta ngena kayu tras (tebelian). Enggau aum serta ati ke sama setuju, dia deh sida Chunggat serumah lalu belaboh ngentak ka rumah baru sida dalam taun 1930 ba endor rumah panjai Ulu Krian ke diatu, lalu rumah panjai nya bedau mengkang bediri nyentok ka searitu.

Tuai Rumah

Doo ak Kantan mati dalam taun 1888 lalu diganti anak iya – Chunggat.

Chunggat ak Doo bebini ngambi Lantong ak Gelayan tang nadai anak, lalu ngiru anak menyadi dua iko iyanya Unya seduai Chundie.

Chunggat ak Doo ninggal ka dunya tu dalam taun 1948. Iya diganti anak lelaki iya empu, Chundie ak Chunggat, nyadi tuai rumah ari taun 1948-1967.

Udah Chundie ak Chunggat badu nyadi tuai rumah, iya diganti anak iru iya ke benama Mula.

Mula ningal ka bilek bebini nguai ka orang, lalu badu nyadi tuai rumah.

Enggom ak Sauh lalu nyadi tuai rumah enda lama, lalu diganti Jamit ak Unya.

Jamit ak Unya nyadi tuai rumah ari taun 1967-1995. Iya mati dalam taun 1995 lalu diganti anak iya Subing ak Jamit @ Langan. Subing nyadi tuai rumah nyentukka saritu.

Nitih ke pengingat orang ke tuai lalu ditampong nyentok ke saritu, bansa Iban udah ngentap ka diri ba menoa Ulu Krian ari taun 1848 datai ke saritu, iya nya lebih ari 160 taun ke udah.

Tusut penatai

Chundie (Matop, Paku) x Umui (Skrang) = Kelanang, Simba, Bunjai, Sudan, Inja, Rekan, Tawie

Simba x Doo ak Kantan (Engkerebai, Paku) = Chunggat, Muli, Rambok, Sendie, Sulah

Sendi x Chuat ak Rembuyan – Chulo (diiru) anak Itut ari Penom, Paku

Chulo x Andun (Dasei) – Ja, Tom
Ja x Enggom (Awik) – Chunggat, Sudau, Limau, Jering, Renyam, Chuat, Gading, Chararing
Gading x James – John Kamar, Charles Gana, Cherl Empenai

 

Chunggat x Lantung = Chundie (iru ari anak Muli ari Penom, Ulu Paku)

Tusut ari Kumpai, Krian

Tarang x Dingu – Insin, Tujuh (Ulu Teru, Baram), Ngadan (nurun ka Bayang, Mallang, Bakong), Edah
Insin (Kumpai, Krian) x Rembuyan (Nanga Ulai, Rimbas) – Chuat
Chuat x Sendi – Chulo (diiru) anak Itut ari Penom, Paku
Chulo x Andun (Dasei) – JA, TOM

JA x ENGGOM AK SAUH (Awik) – Chunggat, Sudau, Limau, Jering, Renyam, Chuat, Gading, Chararing
Gading x James – John Kamar, Charles Gana, Cherl Empenai

TOM x SAWAI – Marina, Nancer, Morgan, Doris, Edmund Helly, Doria, Susana, Mavelyn Nara

Marina x Jais Ak Andau (Ng. Muman, Betong) – Magdalene, Geraldine, Christabelle

Nancer x Michael Malina (Ng. Assam) – Tia Tira Elna Minang, Wilhelm Nyangun, Wenstein Wester, Maclaine Wagner, Thelma Leovina

Doris x Peter Anchal – Marriel Marxella, Dionysius Noah

Mavelyn Nara x Weston Hanley ak James Umbol (Kpg. Sabu, Sri Aman) – Ethan Hector

Tusut ari Dasei, Budu

Sanggu x Gading – Jawai, Jana, Andun, Empenai, Dayang, Denggom
Andun x Chulo – Ja, Tom
Ja x Enggom (Awik) – Chunggat, Sudau, Limau, Jering, Renyam, Chuat, Gading, Chararing
Gading x James – John Kamar, Charles Gana, Cherl Empenai

EMPENAI x KELING AK JALANG (Nanga Kau, Budu) – Beketan, Ringgit, Pia Munggai, Jelumie

PIA MUNGGAI x JOSHUA GUANG AK KAMAR – Wilheminia, James, Augustine, Roland

Wilhelminia x Frank Epps (Calvert, Texas) – Sarah Epps

JAMES x GADING – John Kamar, Charles Gana, Cheryl Empenai

Pulau Ulu Kalas

Penatai bala Doo ak Kantan dimenoa Ulu Krian ending celap, nadai bebunoh, nadai bemunsoh laban menoa Ulu Krian maia nya kelia sigi ending agi puang nadai di wan mensia, serta nadai mega orang ngempu ka menoa.

Nya alai udah terenak ngentap kadiri dimenoa nya, dia deh Doo lalu mai semua bala anembiak redak iya sama-sama berimba betebas babas repa, berumpang aging bebuai batang awak ka bisi endor bumai ngaga sempalai.

Semua pengawa ending dikereja sama-sama. Udah tembu betebas enggau betebang ka kayu, nya baru Tuai mai bala anembiak iya bebagi ka tanah umai ungkup sepintu, nitih ka ripih diri sebilik, diri sekaban ke semak kaul – laban enggai ke mali umai bejenguk enggau diri sekaban, nitih adat bansa Iban.

Udah tembu pengawa umai, tanah pan lalu belaboh diklai orang ke empu jeramik. Bisi sekeda nanam kayu buah, bentara ka genting, sungai, lebak – lalu nyu ke lama hari mensia nyu nemu nanam getah dikena ngingat ka temuda bali rimba diri empu, enggai ka saru lalu tau pulai ka penyarut ngagai orang rebak dudi.

Kelimpah ari endor bukai ba kandang menuo Ulu Krian ke endor bumai bekebun, Ulu Kalas, iya nya menoa ke ending udah disetuju ka orang dulu menya, lebih 100 taun ke udah, endang enda tau diperimba. Menoa Ulu Kalas tu digaga nyadi pulau galau – awak ke bisi endor beramu, beban perau. Lalu nyentok kediatu, orang Ulu Krian suah ngambi kayu medang skrang ke tuat lada ba endor nya. Lalu nambah ke nya, Ulu Kalas endang enda tau ditubai tanah darat, awak ke bisi endor jelu idup serta enggau burung mega. Tu sempekat orang ke tuai dulu menya.

Doo ak Kantan, maia keterubah datai di Ulu Krian, endang enda ngasoh ngerusak rampa menoa asal Ulu Kalas awak ke bisi ka pengidup anembiak redak iya ka serak dudi. Runding ke bakanya endang mengkang ditampung orang Ulu Krian nyentok kediatu.

Leboh Tuai Rumah Doo ninggal ka dunya tu dalam taun 1888, serta kena masa pengawa enggau penemu iya, niang Doo dikuburka ba Pulau Ulu Kalas.

Dalam taun 1948, leboh Chunggat ak Doo mati, menoa ai Sungai Kalas, ari nanga nyentok ka entigis pan di ulitka mega dalam kandang enam bulan. Dalam kandang tempoh nya, nadai siko orang tau ngasu, berikan tauka ngereja macam pengawa ba kandang menoa Kalas.

Pulau Ulu Kalas endang udah ditetapka enggau jako sempekat tuai rumah Ulu Krian ti kedua, iya nya niang Chunggat ak Doo, awak ka nyadi lambing enggau pesaka menoa Ulu Krian. Jako sempekat tu endang semampai dikingatka ari turun siti ngagai turun siti nyentok kediatu.

Kandang menoa ari rumah panjai siti siti endang lama udah begaris bisi antara, lalu Pulau Ulu Kalas mega endang dalam kandang pemakai menoa Ulu Krian. Nya alai, sapa orang ari rumah panjai bukai tauka ari ai bukai, enti ditemu ngasu, berikan, ngambi rutan, ngambi buah tauka ngereja pengawa bukai endang tetao salah, enti nadai pinta, nadai tanya ari orang Ulu Krian, ke empu menoa.

Private Journal of James Joshua